ಇರಾನ್ ವಿಮಾನ ಅಪಘಾತ: 168 ಜನರ ಸಾವು/Iran Plane Accident

ಇರಾನ್ :ವಾಯವ್ಯ ಇರಾನ್‌ನಲ್ಲಿ ಬುಧವಾರ ಸುಮಾರು 168 ಜನರಿದ್ದ ಪ್ರಯಾಣಿಕರ ವಿಮಾನ ಜನತಾಬಾದ್ ಗ್ರಾಮದಲ್ಲಿ ಅಪಘಾತಕ್ಕೀಡಾಗಿ ಎಲ್ಲ ಪ್ರಯಾಣಿಕರೂ ಸಾವನ್ನಪ್ಪಿರುವ ಭೀಕರ ಘಟನೆ ನಡೆದಿದೆ.

ಟೆಹರಾನ್‌ನಿಂದ ಆರ್ಮೇನಿಯ ರಾಜಧಾನಿ ಯೆರೆವಾನ್ ಕಡೆಗೆ ತೆರಳುತ್ತಿದ್ದ ಕಾಸ್ಪಿಯನ್ ಏರ್‌ಲೈನ್ಸ್ ಜೆಟ್ ವಿಮಾನವು ಕಾಜ್ವಿನ್ ನಗರದ ಹೊರಗೆ ಜನ್ನತಾಬಾದ್ ಗ್ರಾಮದ ಬಳಿ ಪತನಗೊಂಡಿತೆಂದು ರಾಷ್ಟ್ರ ಸ್ವಾಮ್ಯದ ಟೆಲಿವಿಷನ್ ತಿಳಿಸಿದೆ. ವಿಮಾನವು ಅಪಘಾತದಿಂದ ಸಂಪೂರ್ಣ ನಾಶವಾಗಿದ್ದು, ಚೂರುಚೂರಾಗಿದೆಯೆಂದು ಮತ್ತು ಅವಶೇಷವು ಬೆಂಕಿಯ ಜ್ವಾಲೆಗೆ ತಿರುಗಿದ್ದಾಗಿ ಕಾಜ್ವಿನ್ ತುರ್ತು ಸೇವೆ ನಿರ್ದೇಶಕ ಹೊಸೈನ್ ಬಹಜಡ್‌ಪೋರ್ ತಿಳಿಸಿದ್ದಾರೆ.

ಕಾಸ್ಪಿಯನ್ ಏರ್‌ಲೈನ್ಸ್ ರಷ್ಯಾ-ಇರಾನ್ ಜಂಟಿ ಯೋಜನೆಯಾಗಿದ್ದು 1993ರಲ್ಲಿ ನಿರ್ಮಿಸಲಾಗಿದೆ. ಇರಾನ್‌ನಲ್ಲಿ ಆಗಾಗ್ಗೆ ವಿಮಾನ ಅಪಘಾತಗಳು ಉಂಟಾಗುತ್ತಿದ್ದು, ಅಮೆರಿಕದ ದಿಗ್ಬಂಧನದಿಂದಾಗಿ ಹಳೆಯ ವಿಮಾನಗಳಿಗೆ ಬಿಡಿಭಾಗ ಸಿಗುವುದು ಕಷ್ಟಾವಾದ್ದರಿಂದ ವಿಮಾನ ಅಪಘಾತಗಳು ಉಂಟಾಗುತ್ತಿದೆಯೆಂದು ಅಮೆರಿಕದ ಮೇಲೆ ಆರೋಪ ಹೊರಿಸಿದೆ.