ಇರಾಕ್ ಆತ್ಮಾಹುತಿ ಬಾಂಬರ್ ದಾಳಿಗೆ 6 ಬಲಿ/Irak-6 Death

ಇರಾಕ್ : ಇರಾಕಿನ ನಗರ ರಾಮಾಡಿಯಲ್ಲಿ ಬುಧವಾರ ಆತ್ಮಾಹುತಿ ಬಾಂಬರ್ ಸ್ಫೋಟಿಸಿಕೊಂಡಿದ್ದರಿಂದ ಕನಿಷ್ಠ 6 ಜನರು ಸತ್ತಿದ್ದಾರೆ ಮತ್ತು 17 ಜನರು ಗಾಯಗೊಂಡಿದ್ದಾರೆ. ನಗರದ ಕೇಂದ್ರದಲ್ಲಿ ಆತ್ಮಾಹುತಿ ದಾಳಿಕೋರ ಸ್ಫೋಟಕಗಳಿಂದ ತುಂಬಿದ ಮಿನಿ ಬಸ್ಸನ್ನು ಚೆಕ್‌ಪಾಯಿಂಟ್‌ನೊಳಗೆ ನುಗ್ಗಿಸಿದ್ದರಿಂದ ಈ ಅನಾಹುತ ಸಂಭವಿಸಿದೆಯೆಂದು ಪೊಲೀಸರು ತಿಳಿಸಿದ್ದಾರೆ.

ಕನಿಷ್ಠ ಇಬ್ಬರು ಟ್ರಾಫಿಕ್ ಪೊಲೀಸರು ದಾಳಿಯಲ್ಲಿ ಸತ್ತಿದ್ದು, ಗಾಯಗೊಂಡವರಲ್ಲಿ ಮಹಿಳೆಯರು ಮತ್ತು ಮಕ್ಕಳು ಸೇರಿದ್ದಾರೆಂದು ಅಧಿಕಾರಿಗಳು ಹೇಳಿದ್ದಾರೆ.ರಮಾಡಿ ಅನ್ಬಾರ್ ಪಶ್ಚಿಮ ಪ್ರಾಂತ್ಯದ ಮುಖ್ಯ ನಗರವಾಗಿದ್ದು, ಸುನ್ನಿ ಭಯೋತ್ಪಾದಕತೆಯ ಮುಂಚಿನ ಕೇಂದ್ರವಾಗಿದೆ. ಆದರೆ ಕಳೆದ ಎರಡು ತಿಂಗಳಿಂದ ಬುಡಕಟ್ಟು ನಾಯಕರು ಉಗ್ರರ ನಂಟನ್ನು ತ್ಯಜಿಸಿ ಅಮೆರಿಕ ನೇತೃತ್ವದ ಪಡೆಗಳಿಗೆ ಬೆಂಬಲಿಸಿದ್ದರಿಂದ ಹಿಂಸಾಚಾರವು ತೀವ್ರವಾಗಿ ತಗ್ಗಿದೆ.

ಚೆಕ್ ಪಾಯಿಂಟ್ ಬಳಿ ವಾಹನಗಳನ್ನು ಅಧಿಕಾರಿಗಳು ತಪಾಸಣೆ ಮಾಡುತ್ತಿದ್ದಾಗ ಸಾಲಿನ ಕೊನೆಯಲ್ಲಿದ್ದ ವಾಹನವೊಂದು ಹಠಾತ್ತನೇ ಸ್ಫೋಟಿಸಿತೆಂದು ಪೊಲೀಸ್ ಲೆಫ್ಟಿನೆಂಟ್ ಹತೀಂ ಅಬೀದ್ ತಿಳಿಸಿದ್ದಾರೆ. ಗಾಯಗೊಂಡರವರಲ್ಲಿ ಕೆಲವರು ಗಂಭೀರ ಸ್ಥಿತಿಯಲ್ಲಿದ್ದು ಸತ್ತವರ ಸಂಖ್ಯೆ ಇನ್ನೂ ಹೆಚ್ಚಬಹುದೆಂದು ರಾಮಾಡಿ ಆಸ್ಪತ್ರೆಯ ವೈದ್ಯ ತಿಳಿಸಿದ್ದಾರೆ. ಅಮೆರಿಕ ಪಡೆಗಳು ಇರಾಕ್ ಪಟ್ಟಣಗಳು ಮತ್ತು ನಗರಗಳಿಂದ ಸಂಪೂರ್ಣವಾಗಿ ಹಿಂತೆಗೆದುಕೊಂಡ ಎರಡು ವಾರಗಳಲ್ಲೇ ಆತ್ಮಾಹುತಿ ಬಾಂಬ್ ದಾಳಿ ಸಂಭವಿಸಿದೆ.