ಜಾಕ್ಸನ್/Jakson

ಜಾಕ್ಸನ್ ಆಸ್ತಿಗೆ ವಾರಿಸುದಾರರು ಯಾರು?

ಲಾಸ್‌ಏಂಜಲೀಸ್: PTIಖ್ಯಾತ ಪಾಪ್ ತಾರೆ ಮೈಕೆಲ್ ಜಾಕ್ಸನ್‌ರ ಮೊದಲ ಶವ ಪರೀಕ್ಷೆಯಿಂದ ತೃಪ್ತರಾಗದ ಜಾಕ್ಸನ್ ಕುಟುಂಬದವರ ಒತ್ತಾಯದ ಮೇರೆಗೆ ಭಾನುವಾರ ಎರಡನೇ ಬಾರಿಗೆ ಶವ ಪರೀಕ್ಷೆ ನಡೆಸಲಾಯಿತು.ಎರಡನೇ ಶವ ಪರೀಕ್ಷೆಯನ್ನು ಖಾಸಗಿಯಾಗಿ ನಡೆಸಲಾಗಿದ್ದು, ವರದಿಯನ್ನು ಜಾಕ್ಸನ್‌ರ ಕುಟುಂಬಕ್ಕೆ ನೀಡಲಾಗಿದೆ. ಆದರೂ ಜಾಕ್ಸನ್ ಅವರು ಅತಿಯಾದ ಔಷಧ ಸೇವನೆಯಿಂದಲೇ ಸಾವನ್ನಪ್ಪಿರುವುದಾಗಿ ತಿಳಿಸಲಾಗಿದೆ.ಜಾಕ್ಸನ್‌ರ ಸಾವಿನ ಕೊನೆಯ ಹಂತದಲ್ಲಿ ಅವರ ಬಳಿ ಇದ್ದ ಜಾಕ್ಸನ್‌ರ ವೈದ್ಯರ ಬಗ್ಗೆ ಕುಟುಂಬಕ್ಕೆ ತೀವ್ರ ಅನುಮಾನಗಳು ಮೂಡಿವೆ. ಅಲ್ಲದೇ ಜಾಕ್ಸನ್‌ರನ್ನು ಉದ್ದೇಶಪೂರ್ವಕವಾಗಿ ಕೊಲ್ಲಲಾಯಿತೇ? ವೈದ್ಯರೇ ಇಂಜೆಕ್ಷನ್ ಚುಚ್ಚಿದರೇ? ಎಂಬಿತ್ಯಾದಿ ಪ್ರಶ್ನೆಗಳು ಜಾಕ್ಸನ್ ಸಾವಿನ ಸುತ್ತ ಏಳತೊಡಗಿದೆ.ಆಸ್ತಿಗೆ ವಾರಿಸುದಾರರು ಯಾರು?: ಜಾಕ್ಸನ್ ಸಾವಿನ ನಂತರ ಅವರ ಆಸ್ತಿಗೆ ವಾರಿಸುದಾರರು ಯಾರು ಎಂಬುದರ ಗೊಂದಲ ಈಗ ಶುರುವಾಗಿದೆ. ಜಾಕ್ಸನ್‌ರ ಇಬ್ಬರ ಮಕ್ಕಳ ಭವಿಷ್ಯದ ಬಗ್ಗೆ ನ್ಯಾಯಾಲಯ ತೀರ್ಮಾನಿಸಬೇಕಾಗಿದೆ.ಜಾಕ್ಸನ್‌ರು ತಮ್ಮ ವಾರಿಸುದಾರರ ಬಗ್ಗೆ ಏನಾದರೂ ಬರೆದಿದ್ದಾರೆಯೇ ಅಥವಾ ವಾರಿಸುದಾರರನ್ನಾಗಿ ಯಾರನ್ನಾದರೂ ಗುರುತಿಸಿದ್ದಾರೆಯೇ ಎಂಬುದು ಸದ್ಯಕ್ಕೆ ತಿಳಿದು ಬಂದಿಲ್ಲ.ಜಾಕ್ಸನ್‌ರು ತಮ್ಮ ವಹಿವಾಟನ್ನು ಯಾರು ಮುಂದೆ ಸಂಭಾಳಿಸುವವರು ಎಂಬುದು ಕುಟುಂಬದ ಸದಸ್ಯರಿಗೆ ತಿಳಿದಿಲ್ಲ ಎಂದು ಜಾಕ್ಸನ್ ನಿಕಟವರ್ತಿಯೊಬ್ಬರು ತಿಳಿಸಿದ್ದಾರೆ. ಜಾಕ್ಸ ನ್ ಮೂವರು ಮಕ್ಕಳನ್ನು ಅಗಲಿದ್ದಾರೆ. ಮೈಕೆಲ್ ಜೋಸೆಫ್ ಜಾಕ್ಸನ್ ಜೂನಿಯರ್(12ವ), ಪರೀಸ್ ಮೈಕೇಲ್ ಕತ್ರೀನೆ ಜಾಕ್ಸನ್(11ವ) ಹಾಗೂ ಪ್ರಿನ್ಸ್ ಮೈಕೇಲ್(7).

ಜಾಕ್ಸನ್ ಮರಣಪತ್ರ ಕುಟುಂಬದ ಟ್ರಸ್ಟ್‌ಗೆ :
ಖ್ಯಾತ ಪಾಪ್ ತಾರೆ ಮೈಕೆಲ್ ಜಾಕ್ಸನ್ ತಮ್ಮ ಮರಣಪತ್ರದಲ್ಲಿ ತಮ್ಮ ಇಡೀ ಎಸ್ಟೇಟನ್ನು ಕುಟುಂಬದ ಟ್ರಸ್ಟ್‌ಗೆ ನೀಡಿರುವುದಾಗಿ ಬರೆದಿದ್ದಾರೆ. ತಮ್ಮ ಮಾಜಿ ಪತ್ನಿ ಡೆಬ್ಬಿ ರೋವ್ ಅವರ ಹೆಸರನ್ನು ಮರಣಪತ್ರದಲ್ಲಿ ಉದ್ದೇಶಪೂರ್ವಕವಾಗಿ ಕೈಬಿಟ್ಟಿದ್ದಾರೆ. ಜಾಕ್ಸನ್ ಅವರ ಮ‌ೂರು ಮಕ್ಕಳ ಆರೈಕೆ ಮಾಡಲು ಜಾಕ್ಸನ್ ತಾಯಿ ಅಸಮರ್ಥರಾದರೆ ಸುದೀರ್ಘಕಾಲದ ಸ್ನೇಹಿತೆ ಮತ್ತು ಹಾಡುಗಾರ್ತಿ ಡಯಾನ ರೋಸ್ ಅವರನ್ನು ತಮ್ಮ ಮ‌ೂರು ಮಕ್ಕಳ ಪೋಷಕರೆಂದು ಜಾಕ್ಸನ್ ಹೆಸರಿಸಿದ್ದಾರೆ.ಜಾಕ್ಸನ್ ಅವರ ಮರಣಪತ್ರ 2002ರ ಜು.7ರ ದಿನಾಂಕದ್ದಾಗಿದ್ದು, ಅವರ ಎಸ್ಟೇಟ್ 500 ಮಿಲಿಯನ್ ಡಾಲರ್ ಮೌಲ್ಯವುಳ್ಳದ್ದಾಗಿದೆ. ಡೆಬ್ಬಿ ರೋವ್ ಜಾಕ್ಸನ್ ಅವರನ್ನು 1996ರಲ್ಲಿ ವಿವಾಹವಾಗಿ 1999ರಲ್ಲಿ ವಿಚ್ಛೇದನ ನೀಡಿದ್ದರು. ಮಕ್ಕಳನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳುವ ಹಕ್ಕನ್ನು ಕೈಬಿಟ್ಟ ಅವರು ಅದಕ್ಕಾಗಿ 2003ರಲ್ಲಿ ಪುನಃ ಪ್ರಯತ್ನಿಸಿದರು. 2006ರಲ್ಲಿ ಜಾಕ್ಸನ್ ಮತ್ತು ರೋವ್ ಒಪ್ಪಂದ ಮಾಡಿಕೊಂಡಿದ್ದು, ಒಪ್ಪಂದದ ಷರತ್ತುಗಳು ಬಯಲಾಗಿಲ್ಲ.ಜಾಕ್ಸನ್ ಕಿರಿಯ ಪುತ್ರ 7 ವರ್ಷ ವಯಸ್ಸಿನ ಪ್ರಿನ್ಸ್ ಮೈಕೇಲ್ ಬಾಡಿಗೆ ತಾಯಿಗೆ ಜನಿಸಿದ್ದು, ಬಾಡಿಗೆ ತಾಯಿಯ ಗುರುತು ಬಹಿರಂಗಪಡಿಸಿಲ್ಲ. ಮೈಕೆಲ್ ತಾಯಿ ಕ್ಯಾಥರೀನ್ ಜಾಕ್ಸನ್ ಅವರಿಗೆ ಜಾಕ್ಸನ್ ಮ‌ೂರು ಮಕ್ಕಳನ್ನು ನೋಡಿಕೊಳ್ಳುವ ತಾತ್ಕಾಲಿಕ ಪೋಷಕ ಜವಾಬ್ದಾರಿ ವಹಿಸಲಾಗಿದ್ದು, ಮಕ್ಕಳ ಕಾನೂನುಬದ್ಧ ಪೋಷಕರು ಯಾರೆಂದು ಕೋರ್ಟ್ ನಿರ್ಧರಿಸಲಿದೆ.

ಜಾಕ್ಸನ್‌ ಹೊಟ್ಟೆಗೆ ಪಂಪ್ ಮಾಡಿದ್ದೆ:
ಖ್ಯಾತ ಪಾಪ್ ತಾರೆ ಮೈಕೆಲ್ ಜಾಕ್ಸನ್ ಅವರ ಮ‌ೂವರು ಮಕ್ಕಳಿಗೆ ದಾದಿಯಾಗಿದ್ದ ಮಹಿಳೆಯು ಜಾಕ್ಸನ್ ದೇಹದಲ್ಲಿರುವ ನೋವುನಿವಾರಕಗಳ ಕಾಕ್‌ಟೇಲ್ ತೆಗೆಯಲು ಅನೇಕ ಬಾರಿ ಅವರ ಹೊಟ್ಟೆಗೆ ಪಂಪ್ ಮಾಡಬೇಕಾಯಿತೆಂದು ಹೇಳಿದ್ದಾರೆ.ಕಳೆದ ಡಿಸೆಂಬರ್‌ನಲ್ಲಿ ಜಾಕ್ಸನ್ ಅವರಿಂದ ಹಠಾತ್ತಾಗಿ ವಜಾಗೊಂಡಿದ್ದ ದಾದಿ ಗ್ರೇಸ್ ವರಾಂಬ ಮೈಕೇಲ್ ಸಾವಿನಿಂದ ಅವರ ಮಕ್ಕಳ ಭವಿಷ್ಯದ ಬಗ್ಗೆ ಆತಂಕಿತರಾಗಿದ್ದು, ಯುರೋಪ್‌ನಿಂದ ಮಕ್ಕಳ ಜತೆ ಸೇರಲು ಲಾಸ್ ಏಂಜಲ್ಸ್‌ಗೆ ಪ್ರಯಾಣಿಸಿದ್ದಾರೆ.ಮೈಕೆಲ್ ವೈದ್ಯ ಕಾನ್ರಾಡ್ ಮರ್ರೆ ಮೈಕೆಲ್ ಸಾವಿಗೆ ಸ್ವಲ್ಪ ಮುಂಚೆ ಡೆಮೆರಾಲ್ ಚುಚ್ಚುಮದ್ದು ನೀಡಿದ್ದರೆಂಬ ವರದಿ ನಡುವೆ ಮೈಕೆಲ್ ಜಾಕ್ಸನ್ ಅಂತಿಮ ಕ್ಷಣಗಳಲ್ಲಿ ಉತ್ತರ ಸಿಗದ ಪ್ರಶ್ನೆಗಳಿಂದ ಜಾಕ್ಸನ್ ಕುಟುಂಬ ಆಕ್ರೋಶಗೊಂಡಿದೆ. ಪಾಪ್ ತಾರೆ ಮಾದಕದ್ರವ್ಯದ ನೋವುನಿವಾರಕಗಳಿಗೆ ದಾಸರಾಗಿದ್ದು, ತಾವು ಅವರ ಹೊಟ್ಟೆಯನ್ನು ಅನೇಕ ಬಾರಿ ಪಂಪ್ ಮಾಡಿದ್ದಾಗಿ ವರಾಂಬ ಹೇಳಿದ್ದಾರೆ. ತಾವು ಒಂದೊಮ್ಮೆ ಜಾಕ್ಸನ್ ತಾಯಿ ಕೆಥರಿನ್ ಮತ್ತು ಸೋದರಿ ಜಾನೆಟ್‌ ಅವರಿಗೆ ಮಧ್ಯಪ್ರವೇಶಿಸಿ ಜಾಕ್ಸನ್ ಅವರ ಚಟಕ್ಕೆ ಚಿಕಿತ್ಸೆ ಪಡೆಯಲು ಮನವೊಲಿಸುವಂತೆ ಕೋರಿದ್ದರು. ಆದರೆ ತನಗೆ ವಂಚಿಸುತ್ತಿರುವ ಬಗ್ಗೆ ಜಾಕ್ಸನ್ ಆರೋಪಿಸಿ ಅವರನ್ನು ವಜಾ ಮಾಡಿದ್ದರು. ರುವಾಂಡ ಸಂಜಾತೆ ರುರಾಂಬ ಜಾಕ್ಸನ್ ಅವರಲ್ಲಿ ಒಂದು ದಶಕಕ್ಕಿಂತಲೂ ಹೆಚ್ಚು ಕಾಲ ಕೆಲಸ ಮಾಡಿದ್ದರು. ಮೊದಲಿಗೆ ಕಚೇರಿ ಸಹಾಯಕರಾಗಿ ಬಳಿಕ ಅವರ ಮಕ್ಕಳಿಗೆ ದಾದಿಯಾಗಿ ಕೆಲಸ ನಿರ್ವಹಿಸಿದ್ದರು.

ನಿದ್ರೆಬರಿಸುವ ಔಷಧಕ್ಕಾಗಿ ಒತ್ತಾಯಿಸಿದ್ದ ಜಾಕ್ಸನ್ :
ಪಾಪ್ ತಾರೆ ಮೈಕೆಲ್ ಜಾಕ್ಸನ್ ಸಾವಿಗೆ ಕೆಲವು ತಿಂಗಳ ಮುಂಚೆ ತೀವ್ರ ನಿದ್ರಾಹೀನತೆಯಿಂದ ಬಳಲುತ್ತಿದ್ದರೆಂದು ಪೌಷ್ಠಿಕ ತಜ್ಞೆಯೊಬ್ಬರು ತಿಳಿಸಿದ್ದಾರೆ. ಉಪಶಮನ ಔಷಧಗಳು ಹಾನಿಕಾರಕವೆಂದು ಎಚ್ಚರಿಕೆ ನೀಡಿದ್ದರೂ ನಿದ್ರೆ ಬರುವುದಕ್ಕಾಗಿ ಪ್ರಭಾವಶಾಲಿ ಉಪಶಮನ ಔಷಧ ನೀಡುವಂತೆ ಜಾಕ್ಸನ್ ಒತ್ತಾಯಿಸುತ್ತಿದ್ದರೆಂದು ಪೌಷ್ಠಿಕ ತಜ್ಞೆ ಹೇಳಿದ್ದಾರೆ.ನೊಂದಾಯಿತ ಶುಶ್ರೂಷಕಿಯಾದ ಚೆರಿಲಿನ್ ಲೀ, ಜಾಕ್ಸನ್ ಅವರಿಗೆ ಪೌಷ್ಠಿಕತೆಯ ಸಲಹೆ ನೀಡುತ್ತಿದ್ದು, ಡಿಪ್ರಿವಾನ್ ಔಷಧ ಬೇಕೆಂಬ ಜಾಕ್ಸನ್ ಒತ್ತಾಯವನ್ನು ಮತ್ತೆ ಮತ್ತೆ ನಿರಾಕರಿಸಿದ್ದಾಗಿ ಮಂಗಳವಾರ ಹೇಳಿದ್ದಾರೆ.ಆದರೆ ಜಾಕ್ಸನ್ ಸಾವಿಗೆ ನಾಲ್ಕು ದಿನಗಳ ಮುಂಚೆ ಸ್ವೀಕರಿಸಿದ ಆತಂಕದ ದೂರವಾಣಿ ಕರೆಯಿಂದ ಜಾಕ್ಸನ್ ಹೇಗಾದರೂ ಮಾಡಿ ಡಿಪ್ರಿವಾನ್ ಔಷಧವನ್ನು ಅಥವಾ ಬೇರಾವುದೇ ಔಷಧವನ್ನು ನಿದ್ರೆಬರುವುದಕ್ಕಾಗಿ ಸೇವಿಸಿರಬಹುದೆಂದು ಶಂಕಿಸಿದ್ದಾಗಿ ಲೀ ಹೇಳಿದ್ದಾರೆ.ಜೂ.21ರಂದು ಜಾಕ್ಸನ್ ಸಿಬ್ಬಂದಿಯೊಬ್ಬ ಆತಂಕದಿಂದ ಕರೆ ಮಾಡಿದ. ಮೈಕೆಲ್ ಈ ಕೂಡಲೇ ನಿಮ್ಮನ್ನು ಕಾಣಲು ಬಯಸುತ್ತಿದ್ದಾರೆಂದು ಹೇಳಿದ. ಏನಾಗಿದೆಯೆಂದು ತಾವು ಕೇಳಿದ್ದಾಗಿಯ‌ೂ ಬಳಿಕ 'ತನ್ನ ದೇಹದ ಒಂದು ಭಾಗ ಬಿಸಿಯಾಗಿದ್ದು ಇನ್ನೊಂದು ಭಾಗ ತಣ್ಣಗಿರುವುದಾಗಿ' ಮೈಕೆಲ್ ಹಿನ್ನೆಲೆಯಲ್ಲಿ ಹೇಳಿದ್ದು ತಮಗೆ ಕೇಳಿಸಿತೆಂದು ಲೀ ತಿಳಿಸಿದ್ದಾರೆ. ಅಲ್ಲಿ ಏನಾಯಿತೆಂದು ತಮಗೆ ತಿಳಿಯದೇ ಕೂಡಲೇ ಮೈಕೆಲ್ ಆಸ್ಪತ್ರೆಗೆ ಸೇರುವುದು ಅಗತ್ಯವೆಂದು ತಾವು ತಿಳಿಸಿದ್ದಾಗಿ ಹೇಳಿದರು.ಆ ಹಂತದಲ್ಲಿ ಕೇಂದ್ರ ನರವ್ಯೂಹಕ್ಕೆ ಆಘಾತಕಾರಿ ಔಷಧವನ್ನು ಯಾರೊ ಮೈಕೆಲ್‌ಗೆ ನೀಡಿದ್ದಾರೆಂದು ತಾವು ಶಂಕಿಸಿದ್ದಾಗಿ ಅವರು ಹೇಳಿದರು.

ಸತ್ತ ಮೇಲೂ ಜಾಕ್ಸನ್‌‌ ಆಲ್ಬಂಗೆ ಅಪಾರ ಬೇಡಿಕೆ :
ಪಾಪ್ ತಾರೆ ಮೈಕೆಲ್ ಜಾಕ್ಸನ್ ಸಾವಿನ ಸುದ್ದಿ ಹರಡುತ್ತಿದ್ದಂತೆ ರೇಡಿಯೊ ಕಾರ್ಯಕ್ರಮ ನಿರೂಪಕರು ದೇಶಾದ್ಯಂತ ಅವರ ಹಾಡುಗಳನ್ನು ಹಾಕಿದರು.ಅಭಿಮಾನಿಗಳು ಜಾಕ್ಸನ್ ಸಂಗೀತದ ಆಲ್ಬಂ ಖರೀದಿಗೆ ಮುಗಿಬಿದ್ದಿದ್ದರಿಂದ ಬಿಲ್‌ಬೋರ್ಡ್ ಮಾರಾಟದ ಚಾರ್ಟ್‌ನಲ್ಲಿ ದಾಖಲೆ ಮುರಿದಿದೆ. ಅಮೆರಿಕದಲ್ಲಿ ಮ‌ೂರು ಅತ್ಯುತ್ತಮ ಮಾರಾಟದ ಆಲ್ಬಂಗಳಾದ 'ನಂಬರ್ ಒನ್ಸ್' 108,000 ಪ್ರತಿಗಳು ಮಾರಾಟವಾಗಿದ್ದರೆ, ದಿ ಎಸೆನ್ಷಿಯಲ್ ಮೈಕೆಲ್ ಜಾಕ್ಸನ್‌ನ 102,000 ಪ್ರತಿಗಳು ಮತ್ತು ಥ್ರಿಲ್ಲರ್ 101,000 ಪ್ರತಿಗಳು ಮಾರಾಟವಾಗಿವೆ.ಒಟ್ಟು ವಾರದಲ್ಲಿ ಜಾಕ್ಸನ್ ಆಲ್ಬಮ್‌ಗಳ 422,000 ಪ್ರತಿಗಳು ಮಾರಾಟವಾಗಿದ್ದು, ಹಿಂದಿನ ವಾರದ ಅಂಕಿಅಂಶಕ್ಕಿಂತ 40ಪಟ್ಟು ಹೆಚ್ಚಾಗಿದೆ. ಅಭಿಮಾನಿಗಳು ಜಾಕ್ಸನ್ ಆಲ್ಬಂಗಳಲ್ಲಿ ಕಂಡಿದ್ದೆಲ್ಲವನ್ನು ಖರೀದಿಸುತ್ತಿದ್ದು, ಅನೇಕ ಚಿಲ್ಲರೆ ಅಂಗಡಿಗಳಲ್ಲಿ ದಾಸ್ತಾನು ಖಾಲಿಯಾಗಿತ್ತು. ಶೇ.57ರಷ್ಟು ಆಲ್ಬಂ ಮಾರಾಟವು ಡಿಜಿಟಲ್ ಡೌನ್‌ಲೋಡ್‌ಗಳಾಗಿದ್ದು, ಸಿಂಗಲ್ ಟ್ರಾಕ್ಸ್‌ನ 2.3 ಮಿಲಿಯ ಡೌನ್‌ಲೋಡ್‌ಗಳು ಮಾರಾಟವಾಗಿವೆ.ಸೌಂಡ್‌ಸ್ಕಾನ್ ಕಳೆದ ಐದು ವರ್ಷಗಳ ಡೌನ್‌ಲೋಡ್‌ಗಳ ಜಾಡು ಹಿಡಿದಾಗ, ಒಂದು ವಾರದಲ್ಲಿ ಯಾವುದೇ ಕಲಾವಿದ ಒಂದು ದಶಲಕ್ಷ ಟ್ರಾಕ್ಸ್ ಮಾರಾಟವಾಗಿಲ್ಲ. ಕಳೆದ ವರ್ಷ ಜಾಕ್ಸನ್ ಒಟ್ಟು 2.8 ದಶಲಕ್ಷ ಟ್ರಾಕ್ಸ್ ಮಾರಾಟ ಮಾಡಿದ್ದಾರೆ.